2013大事回顧

2013年12月30日 星期一

話咁快又一年啦~又要到我每年必做既回顧, 呢一年實在太充實!

當中有開心亦有唔開心, 我希望新一年大家都身體健康, 開開心心就夠啦~

Jan

14^th – 景逸軒比埋最後一次訂, 埋尾啦~

20^th – 過大禮

Feb

5^th – 媽咪身體有事, so sad

22^nd – 開姊妹會, 我有班好鍚我既姊妹

27^th – 媽咪做手術, 好擔心, 但好快出返黎無事

呢個月不停澳門香港2邊走, 又不停咁搞結婚事宜, 心力交瘁既一個月

Mar

5^th – 最尾一刻決定加多條婚紗

7^th – 開始放假, 去左洗牙

8^th – 第一次整gel甲, 忙到暈, 舅父幫我上頭

9^th – 我。結。婚。了, 有一個完美的婚禮

10^th – 還衫, 回門

12^th – 返工lu~

17^th – 出發, 終於第一次踏足歐洲

18-23^rd – 西班牙

24-30^th – 法國

充實滿足的一個月, 我做左李太, 去左一個滿足的honeymoon

Apr

18^th – 媽咪覆診, 好彩一切都話好好

30^th – 一個月就拎齊結婚相, 萬般感覺

May

24^th – 第一次同Jon仔同Joanne入元朗食飯, 估唔到就咁熟左

30^th – 我們拍拖9年了

Jun
4^th – 試玩左泰拳, 係時候要郁下啦

23^rd – 玩密碼, 成功逃脫

Jul

1^st – 3號風球坐船入砰洲, 好暈呀

2^nd – 第一次body check

26^th – 公司十周年, 去左半島食buffet

28^th – 去左老闆屋企玩, 落clubhouse 玩桌球, 唱k

Aug

3^rd – 最鍚的表妹黎左我屋企訓

14^th – 打風, 有半天假

17^th – 同Joanne, Jon &佢細佬去澳門一日遊, 超呢hea

31^st – 出發去泰國with Jon & Joanne, 熟左知知3個月就成行了

Sep

1-3^rd – 4日3夜在曼谷

7^th – 再次坐凌晨機到大阪

8-14^th – 慶祝結婚半年的大阪之旅完滿地結束

21^st – 第一次入屯門龍珠島, Jon爸爸煮餸超掂呀!

22^nd – 打8號風球, 超巿比人掃清光

27^th – 第一次煮晒成餐飯比朋友食 5個餸

Oct

1^st – 我生日了, 又大一歲,

14^th – 報左考車

17^th – 過澳門同媽咪覆診, 好彩一切安好

Nov

3^rd – 第一次先生夫人咁出席wedding

10^th – mabel出嫁了, 做姊妹

23^rd – 一個人買7個餸同左7味餸出黎, 忙足成日, 但勁有滿足感

30^th – 我們9年半了

Dec

6^th – 申請左迪士尼全年通行證

11^th – 考筆試, 合格左, 但要等7月至有得考

18^th – 第一炮Christmas party, 最凍的一天,搬左出黎九龍入返新界真係覺得好凍

20^th – 第二炮Christmas party, 入到上水都好凍, 凍到個人呆晒

21^st – 第三炮Christmas party, 呢班朋友例牌玩抽錢, 今年蝕左$10 tim!

24^th – 2 pairs人係屋企自家煮, 輕鬆自在的一個平安夜

聖誕節無乜特別, 因為真係好怕同人逼, 同埋真係好攰

2013年就完左, 我成為左李太, 展望2014年

仲有半個月就2014年

2013年12月18日 星期三

12月話咁快又過左一半多d~
好快就2014年,歲月不留人

係Sogo thankful week到買左呢套床單
以前細個成日諗, 出黎住一定要用唐老鴨床單
但出黎住左後無特別去搵
咁岩見到佢連羊毛被都係$7xx
決定買左佢返屋企, 完全無諗過佢得5百針左右
換左佢之後行入房成日都偷笑
我真係覺得好靚, 好鐘意唐老鴨呀~

 

事隔3年, 估唔到我地又再申請迪士尼年票
足足3年無入過迪士尼
多左好多野未玩過~
因為老公突然被過4日假, 拎左一日星期五陪佢
走入迪士尼, 比想像中小人
玩好多野都唔係排好耐~
唔知係咪人大左, 少左份童真
無3年前咁興奮, 但都係開心架~
黎緊呢年, 我諗我會充滿奇妙!

 

重點在於我的水鞋
我一跟都想買對水boots
但驚求其買會好焗腳兼變左買魚佬

一路鐘情於hunter, 但太貴, 一路都無出手
直至9月去日本, 見到ABC Mark果d都係大約千零蚊
但點知一日行行下, 見到間鋪做特價
走入去, 無咩色可揀, 可能因為斷碼
最後$6xx咁吸引既價錢, 爆喼都帶佢返黎
返到黎都著過幾次~
著上腳真係好修, 個形好靚~
仲好開心, 落大雨唔洗怕
腳掌位唔係好焗, 但我覺得小腿位有少少焗
落雨多數夏天, 即係唔可以長時間落住佢囉?

11月雜記

2013年12月1日 星期日

結婚後真係無咩特別好打
唯有一次blog晒一個月啦~
我依家淨係圍繞住食食食同食!

每逢有朋友生日, 都會一大班出黎慶祝
大約一個月一次, 好開心識到呢班朋友
希望我地既友誼可以一直落去!

 

去朋友屋企, 佢有企有2隻玩具貴婦

好乖, 超乖, 真係好得意

我以前唔敢摸佢地

因為佢地咁乖, 我都係咁摸!!!

呢班朋友由中一開始認識~
因為其中一去左美國但失去左聯絡~

基本上我都淨係另一個朋友有聯絡
諗住唔會有咩進一步發展架啦! (即係無左班frd)

但突然某一日同個朋友傾開電話
話不如試下打電話比佢(果時仲係興打屋企)
抱住失望既心情講"唔該搵xxxx"
但電話另一邊答"我係~"
我同另一個朋友即時呆左, 原來咁岩佢返左黎香港
即刻約出黎食飯, 原來佢係美國無晒d電話
搵唔返我地, 自始, 佢係美國返黎我地都會出黎食下飯
好開心既係, 我結婚佢都突登係美國返黎飲!!
以前讀書, 上佢屋企食飯, 識左佢工人姐姐
好好傾, 估唔到, 佢唔做啦~返去印尼lu~
咁我地又上佢屋企打搞佢!
工人姐姐煮d野真係超好味~食到個個無停口

 

第二日, 要做姊妹~好友Mabel結婚了!

好開心呀, 秘書班同學嫁淨一個咋~

不過, winnie都好事近架啦!

去返自己出門酒店, 真係份外有親切感, haha~

Happy Friday的一天
因為果個星期好多時都出街食, 所以呢日自己煮
煮蒜蓉蒸開邊蝦同窩蛋牛肉煲仔飯
因為2樣野老公都好鐘意
但upload左張相上網, 個個人都話好多蔥
咁煮完呢餐唔知幾時先再煮嘛, 咪一次落晒佢囉~hahaha
仲有, 原來依家(定不嬲都係?)d蝦咁貴架~
成百幾二百蚊一斤, 咁出去食蒸開邊蝦係咪仲抵呢?

 

我以往無去開sogo既thankful week

因為我真係好怕逼~

但今年要買張被過冬天, 所以決定去睇睇

超多人, 但好彩家品部都唔彩好多

因為準備買部焗爐, 所以去左LC買左2個焗盤

無粉紅色, 不過都咁抵算係咁啦~

買完焗盤, 買左2個枕頭, 一張被, 一張床單

仲去goupon到換左2張床單

嘩, 超重咁拎返屋企,拎到我地2個死呀!

買完焗盤第二日梗係出發買個焗爐啦~
買左焗爐, 即刻整個一哥焗豬扒飯
飯太濕, 芝士買錯左唔溶既!
不過焗過係香好多,好味好多~我會努力研究下!

好似好耐無打邊爐
抽起條筋在家打邊爐
少少野但係都食唔晒, 真係好滿足既一餐呀!

早餐, 我總係對魚柳有不能抗拒的感覺
M記出左吉列魚柳, 我當然會試啦~
但係, 超難食呀! 個魚腥既, 無下次呀!

 

某個星期六, 朋友話黎我屋企食飯

超大壓力呀, 此終有d唔太熟, 唔知道佢地既口味

又怕我d菜唔出得大場面, 好驚呀!

一個人買7人份量既餸, 真係拎到我手斷呀!

買完返黎密密切, 密密整呀~

最後真係要比d掌聲自己
係完全靠自己無人幫既情況下, 做出7個人份量既晚餐
有: 泰式粉絲蝦, 紅酒忟牛肋條, 清酒煮蜆
豆腐忟排骨, 蜜糖焗雞奕, 菜x2
好慶興地個個都話好好味
清晒場, 咁我都舒一啖氣啦~

同事去旅行, 佢睇到紅葉, 好羨慕呀!
我都好想睇櫻花, 紅葉, 但唔知點解永遠都夾唔岩時間去睇~
佢買左一大堆手信比我, 真係love you so much~

某日, 老公覺得好耐無据扒
走左去惠康買左$88 2塊扒返黎
估唔到質素都ok喎~平平地咁食都唔錯架喎~

10月雜記

2013年11月1日

時間真係過得好快, 話咁快又到左11月
仲有2個月, 2013年就過去,豐富的2013年~

我大大話話打日記都打左十零年~
由中學開始, 到依家!
因為yahoo blog無左, 搞到個熱誠無左
好懶去打blog lu~

等我記錄返我既野先~
某天朋友黎我家替我慶祝生日!
我一個整左4個餸, 我真心覺得好勁
因為我從來未整過咁多野
整左無水蒸西蘭花(但仲未捉摸到個技巧)
日式豬軟骨, 豆腐西施煲
泰式粉絲蝦(係big c買果隻醬超掂, 好惹味)
仲有朋友整左個牛油炒什菇
個個都讚, 好滿足~

某天, 朋友又黎同我慶祝生日
老公買左個Tony Wong蛋糕
真係好靚, 紫色玫瑰花真係靚好暈~

又某天, 朋友又我家慶祝10月之星生日
係Ocean three叫左d魚生刺身
好似食放題咁, 好瘋狂呀!!
個個食到超滿足~

我屋企細細, 估唔到都可以容納到咁多人
我真係好鐘意1摟2既感覺~
bb好得意!!!!

早前, 朋友話想食壽喜燒
黎左我屋企整~
其實都係自己鐘意食乜就放乜落去~
朋友既蘿蔔超入味, 好好食!
呢餐,食得好滿足~

剛過去既30號, 係我地拍拖9年5個月
就一於去試下Habitu
好多人都試過, 我第一次食
我覺得好好味呀!
杯咖啡同朱古力都超好飲~
超滿足既一餐

 

精彩既10月就咁過去啦~
但11月會係仲煩忙既一個月!
我好enjoy依家既生活
希望可以繼續開開心心落去

Osaka Trip Day 7

2013年9月14日 星期六

Osaka Trip Day 7

黎到呢個trip最後一日啦~
我地見大阪金龍有好多間分店
咁我地梗係要試下啦!
都幾好味架喎其實

 

食完就出發去outlet啦~
個個朋友去完都話好多野買到!
我....我不嬲都係outlet買得好少野架~

我地又買crepe黎食啦...
但都唔好味既!

 

早左到機場, 等夠鐘就check in啦~
關西機場都幾多野行
我地知道機場有神座
我地搵左好耐, 原來走漏眼, 好開心搵到佢
因為神座係東京食過, 覺得好好味!
所以我今次都好想食返佢~
依舊都係好味道!!!!

 

大阪之旅就咁完左lu~
係呢一刻, 我地又準備好出年3月出發去我地結婚一年之旅
呢個地方, 我期待左好耐,希望可以快d成行

Osaka Trip Day 6

2013年9月13日 星期五

Osaka Trip Day 6

黎到last 2 days啦~
今日決定去杯麵博物館!
落左車都要搵左一陣先搵到個館係邊到~

入到去職員叫我地畫左杯麵先~
我地去買左個杯就開始畫啦!

畫完就排隊制作杯麵啦~
好得意, 首先搞個麵入個杯到
跟住揀味道, 4個餸
跟住佢就會包膠紙
咁個麵就完作左啦!! 一個好有趣既體驗

其實杯麵博物好快就行完睇完!
下一站就係黑門巿場啦~
我地要食lunch呀
叫左個即開海膽,帶子, 同鱈場蟹
超好味, 埋單三百蚊有找, 抵食到爆
跟住仲食左個蠔, 但個蠔就一般姐!

返去酒店放低d野~
係附近見返呢間野, 3年前係東京食過
真係超好味,所以即刻走入去買啦!
依然都係咁好味, 好香濃既牛奶味呀!

再周圍行下~終於買到件褸
同踏破石涯無難處
我終於搵到對水boots啦~太感動啦!!
食返個燒章魚丸先!
呢個超好味呀~好軟熟, 好香好味

行多陣又夠鐘食dinner~
唔想食太full
揀左旅遊書介紹既蛋包飯!
個格局好古老
叫左2個蛋白飽, 超超超好味
特別係個松茸蛋白飯, 真係好香
怪唔得松茸要買咁貴啦~
超滿足的一餐
聽日就要返香港lu~

講左好耐要食呢d~
但一路都keep住飽!!!
但今日唔食再無機會啦~因為聽日就要走
好彩今晚ok喎, 咁就買黎食
最後的綠茶蛋糕, 日本既綠茶真係超好味
呢個crepe, 超軟, 好好味!
食完真係好滿足呀~

Osaka Trip Day 5

2013年9月12日 星期四

Osaka Trip Day 5

因為間旅館包左個日式早餐
咁我地梗係要試下啦~
一去到, 見到真係超興奮呀!!!
我終於叫試到呢d一碟碟啦~
有豆腐, 漬物, 茶碗蛋
好嫩既魚, 湯, 一片刺身!
雖然全部都細細碟, 但包埋一碗飯
食完係超飽~

我地梗係唔少得係間房影下相啦~
話晒都係我第一次住呢d房喎
一個好特別既體驗!

 

影完相就check out啦~我地既目的地係伏見稻荷
我鐘意呢d鳥居
一排排紅色好特別~
因為時間都算早, 唔係好多人~
我地可以好輕鬆咁set腳架影相

 

不過, 今日真係超級無敵熱~
頂唔順走左入去食刨冰
終於都試到, 細細個睇漫畫,d主角成日都食架!
本身對佢地無期待望
但一食落, 嘩~
超好味呀!! d冰質感好有咬口
d水果糖漿一d都唔假
個士多啤梨牛奶係超好味~

 

食完就出發去清水寺~
我覺得必黎架!
因為我覺得好神奇, 成個寺一粒釘都無用過~
不過感覺就好似真係到此一遊罷了! haha~
好多人~好多學校黎~
好多人著住浴衣/和服
我好慶幸自己無著, 因為今日真係熱到嘔
全身都濕透

 

 參觀完成, 行返落去車站, 因為附近真係無咩好食!
頂唔順, 走入去買野飲~
日本既便利店永遠都咁多野揀~
日日都食綠茶先安樂
呢個綠茶牛奶好好飲架

 

終於食野啦~
去左旅遊書介紹既箱押壽司~
一般般~但係好貴呀!
我地連續2餐比旅遊書老點左!

 

因為又熱又攰
決定打道回大阪啦~
係車上面訓得超滿足
休息一陣行一陣又要食dinner啦~
去左食燒肉放題
佢有中文餐牌
勁多牛既古怪位置食, 例如
食道周邊肉, 牛胃, 大動脈...
但牛肉真係好味, 牛味好濃!

Osaka Trip Day 4

2013年9月11日 星期三

Osaka Trip Day 4

黎到呢個trip重頭戲啦~
我地今日會去京到
住返2日1夜
其實坐車好快就會到京都~
一出到去, 個車站都好古老
感覺好有歷史!!!
我地要再轉車, 目的地係貴船
上左架車, 沿路都好效區
環境好靚, 車程半個鐘左右~

 

落左火車, 其實有巴士上山
但佢指示話上山只係半個鐘
我見又唔係咁遠, 同埋環境超靚
我地決定行上水!
沿住條馬路行上去, 又無乜車喎~
一望無際似的綠林~
瀑布, 藍天+白雲, 感覺超舒服!

 

行到差唔多到目的既時候
比我見到一, 二棵紅/黃葉
我已經覺得超靚啦~
我估, 我估岩季節黎肯定萬天紅葉
諗起都覺得靚到爆炸呀!

 

終於都到左目的地啦~
行到後段超熱呀!!!熱到死呀!
我地拎籌, 排28, 等左大約3 round左右
越後就越多人, 我覺得真係等好耐~
我地既重頭戲係 - 流水麵

 

坐係席上面, 對住個靚瀑布食老公恨左好耐既流水麵
雖然淨係點素麵汁食
但係超清甜, 超好食!
last一round係紅色, 話比你知end啦~
但紅色係唔好食既!!!!
仲有坐係蓆上食野, 氣溫係低出面5-6度
所以係到等+食完全完地過完冷河
又可以重新出發!

 

去左個歷史悠久既神社
有得求籤, 因為廟到有個水神
所以個方濧都好得意
本身張紙無野既
但將佢一放落d水到, d字就會出晒黎~

 

行完個神社就行返落山lu~
見到有綠茶雪糕, 即刻要試
嘩~超好味, 淡淡綠茶味
濃濃牛奶味, 超鐘意呢隻味道!!!

 

一個好特別的車站
我地要走啦~貴船真係一個好特別既地方
我好鐘意呢一到!!
仲有呢到真係好多日本人黎玩!

返到落去~因為想食cake
所以走左入間餐廳
季節限定粟子,我地叫左粟子蛋糕
仲叫左個蛋三文治
超多汁, 好味好好味!

 

book天間日式旅館黎住~
我真係第一次住呢d房
我對所有野都充滿好奇~
仲有浴池~
我地都有去試浸過架!!!幾特別

 

dinner去左食旅遊書介紹既鰻魚飯
點知係勁普通,覺得好似晒左我個胃咁呀!