2014年12月31 星期三
呢篇我一日打定, 每年我都有個習慣, 將過去一年大事作出點點既紀錄
今年, 我應該完成唔到下半part, 因為呢個時間, 我應該湊緊木子
Jan14:
1Jan - 新一年開始, 我地竟然得閒到去排咖啡弄, 真係只此一次
10Jan: 請老爺奶奶入迪士尼食buffet, 估唔到佢地又會咁鐘意喎!
25Jan - 久違的長洲2日1夜之旅, 喪食
26Jan - B&B張床已經唔好訓, 老公食到個肚唔舒服
31Jan - 大年初一, 第一次派利是, 哈哈
Feb14:
1-3Feb - 年初一玩到年初四, 一日走2,3場, 攰到不堪
15Feb - 第一次正式叫老爺奶奶上黎煮餐飯比佢地食, 好彩佢地好滿意
22Feb - 第6年了, 爸, 你還好嗎?
25Feb - 隌媽咪去澳門覆診, 仲同媽咪家姐係喜來登住返晚
Mar14:
1Mar - 特登摷返d結婚相出黎, 要影返差唔多既pose, 哈哈
5Mar - 出發, 慶祝結婚一年之旅, 馬爾代夫, 我夢味以求既地方
6Mar - 睇到日出, 浮潛見到超勁既魚群
7Mar - join左玩肺潛, 人生第一次, 但我唔多enjoy
8Mar - 基本上每日係島上都係食玩訓, 浮潛, 好不relax
9Mar - 結婚一年了, 我們依然相愛! 今日要離開, 好唔捨得呀!
10Mar - 係馬爾代夫勁熱, 晨早機到香港, 返屋企果陣真係凍到震
11Mar - 已經睇岩租盤, 約左經紀去睇睇先
14Mar - 一致決定租啦~嘩, 超快, 去完旅行返黎第4日已經決定左! 仲要係老爺樓下2層, 超方便
20Mar - 老公生日, 但book左23號先同佢食birthday lunch
23Mar - 出去灣仔, 同老公食蟹膳, 好好味, 佢亦好滿足, 我呢個老公好易滿足!
Apr14:
2Apr - 前一星期不停執野執野, 成間屋都係紙箱! 聽日終於搬走
第一次住九龍, 係好似好方便, 但我住開新界, 都係覺得新界岩我d, 至少無咁大麈
3Apr - 搬返入黎, 又係展開勁執野既日子
5Apr - 經過我努力咁執, 終於搞掂, yeah~超快手的說!
7Apr - 的起心肝, 報左OU黎讀, 第一堂! 加油
12Apr - 難得同Joanne去嘉道理農場, 平時淨係同佢行街架嘛, 哈哈
27Apr - M小姐遲黎左7日, 試下驗孕, 結果顯示懷孕了, 心情好複雜
May14:
基本上知道左有bb之後都係勁攰, 成日都訓覺! 連學都返唔到呀!
5May - 因為流啡, 去左睇醫生, 因為第一次walk in入去, 排到傻左! 照到, bb 6week 2呀!
8May - 之前答應左媽咪返大陸飲表哥果餐
9May - 返香港, 仲要返學, 上到11點先食dinner, 個人攰到不似人形
20May - 返醫院產檢, 見到木子既心跳
28May - 整天作嘔作悶, 今日嘔左出黎, 感覺不好受, 仲要喪咳, 勁擔心影響木子
30May - 拍拖10年了, 時間過得好快, 但我無興趣食西餐, 去返景逸軒食dinner
31May - 學車, 超緊張呀!
Jun14:
17Jun - 終於又到產檢啦! 1個月1次好難捱呀! 木子又大個左,有手有腳
18Jun - 去左尖沙咀, 照唐氏, 木子就咁睇一切正常, 放心左一半
19Jun - 收到電話木子唐氏報告出左, 屬於低風險, 放心晒
Jul14:
14Jul - 過去2星期喪學車, 但無乜得著, 因為師傅唔教野! 今日考車, 2part都肥晒!噢~
Aug14:
1Aug - 去左bb展, 因為一日未照結構一日都唔放心喪買野!,都無乜意慾買野, 話無意慾, 但都買 到一袋二袋, 哈哈
2Aug - 入手尿布, 為環保出一分力, 但咁就無左4千幾lu~
9Aug - 同Jon仔 Joanne入馬灣食buffet, 有左bb咁耐都無化妝執執個樣, 今日終於似返個人, 哈哈
18Aug -又去產檢, 木子一切符合生長, good
19Aug - 終於去到最緊張既一關 - 照結構, 醫生好細心, 好好彩, 木子pass晒, 終於放心晒!
仲知道木子bb係女仔~ yeah!
26Aug - 再學車, 今次搵過第二個阿sir, 呢個有heart好多, 執左我勁多錯處!
28Aug - 美國訂既high chair到左, 木子第一樣大形物品到左, 感覺好唔真 實
Sep14:
16Sep - 8號風球上午放假, 下午產檢繼續, 照到木子係長腿bb
23Sep - 考車again, 泊車pass左, 路試唔好彩, 唔合格, 喔噢!
29Sep - 同老公去左澳門2日1夜, 住左大倉酒店, 環境超得
30Sep - 周圍行, 但超熱超攰, 所以無乜mood就返香港lu~
Oct14:
1Oct - 我生日, 又大一歲, 下年身份唔同左, 所以好好咁享受2人的生日
8Oct - 老爺奶奶送左袋坐月補品比我
12Oct - 29week 影大肚相, 肚唔算大, 唔知影出黎得唔得呢!
15Oct - 報左個產前呼吸班, 好驚生果陣痛到顛左
17Oct - 產檢, 木子已經調左頭, 有3lbs重
28Oct - 美國訂既bb車同car seat都到左, 感覺真係越黎越近
31Oct - 依家產檢2星期一次, 好密! 無見2星期, 木子有4lbs啦! 所有野都符合大細, 叻女
Nov14:
3Nov - 考車again, 終於都pass左啦~太好啦! 太開心啦!!!! yeah
14Nov - 34週啦~重4.5lbs, 醫生話足月出世大約7lbs, 希望真係啦~
23Nov - 去埋last 一次迪士尼, 真係要停一停
30Nov - 我們拍拖10年半
2013年係我重要既一年, 我結婚了, 成為了李太
2014年係我轉淚既一年, 我懷孕了, 成為了媽媽
2個身份的改變, 令我人生充滿挑戰, 我要做得更好!
唔知可唔可以實現我兒時夢想, 30歲前生2個, 有埋木木子就最好!(呢個只係諗下, 生完第一個先再諗啦~)
不過, 依家都好滿足! 有好好既朋友, 算係不錯既老爺 奶奶, 有個好老公, 仲有埋木子~
2014年12月18日 星期四
木子小朋友出世了
2014年12月17日 星期二
依家仲係醫院，小朋友又唔係我身邊
襯得閒update下報個喜先！
我既生女過程真係好快！
原本15號我仲返緊工，諗住木子啲野係呢個星期埋尾（因為醫生話呢個星期未生得架嘛）！返埋星期三就放假～
點知一返到公司開始肚痛，但又無規律喎！咪睇定啲先啦～痛左成朝！老公咁岩落1點，我請假走人啦！痛下唔痛咁就過左個星期一！（當中有少少擔心木子會唔會問題，但老公好淡定）
星期二朝9點左右！係床計時，都係痛得有規律！大約6分鐘一次，今次既痛係下腹扯住痛，唔係尋日既肚痛！起身去洗手間，見紅了！即刻出去食飯再入醫院啦！
入到醫院12點零！check左，開左1度！仲係好輕鬆，得多快生啲嘛！咪係咁行！點零醫生再黎check開到2度，仲以為咁快開心得我丫～
如是者陣痛下唔痛，覺得自己痛左都係得2度（明明痛左架，但都仲接受到既），開始覺得都係要第二先生，第一胎無咁快！10點趕老公走，11點再check都係2度！真係灰到盡！
11點9開始，我開始覺得痛得難受！諗住呢晚都要咁過就係灰到爆～跟住醫生就出現左問我係咪好痛，我答梗係啦！佢幫我check開左4，5度！入得產房啦！
Call老公返黎！入到產房，幫我穿水，一穿左水勁痛啦！但呢個時候我仲可以sms比老公叫佢去埋廁所先（姑娘叫我咁做），諗返起都覺得自己好勁！
老公一黎，我就開左6度！痛到不得之，係咁吸笑氣，個人又迷，不過無笑氣真係頂唔到落去！勁快有想去大便既感覺～醫生出現啦！我可以盡情屙！醫生同助產士都話我屙得好快！最後1點零木子就出世啦～一出世我勁想喊！太感動了！但我講左句，下胎我要開刀！醫生回敬我「今胎你咁快，下胎開刀曬左啲喎」！就係咁，我就展開左1家3口既生活！唔唔知出院後係咪真係勁忙呢！
2014年12月2日 星期二
我們10年半
2014年11月30日 星期日
今日我地拍拖十年半~
其實想出街食!
但我好多野都唔食得, 唯有係屋企自家煮啦!
唔知點解呢排搵左好耐, 都唔見有酥皮
唔見有急凍牛扒, 最後要係又一城間大taste先搵到咋~
買左LC既gill pan梗係要開光啦!
嘩, 老公煎到有格仔紋, 好good呀, 好味道
通粉既白汁自己調制, 真係好味好多喎!!!
而酥皮湯, 因為第一次整, 個酥皮薄得滯, 下次會更好!!!
不得不提個墨西哥芝士片, 好好味, 但係超簡單
只係將一塊塊既芝士片放好, 上面擺滿洋蒽同蕃茄粉
再鋪滿芝士碎擺入焗爐, 等芝士溶晒就搞掂
埋尾, 仲有我至愛既意大利蕃茄既蛋糕
超滿足的10年半!
Hea 遊香港
2014年11月29日 星期六
太遲啦太遲識你~
如果早D識到你, 肯定喪玩, 玩到天昏地暗!
今日天色好差, 但都照出去走走~
走左去西環碼頭, 灘水無左, 但都照影可也
你咁貴買左部相機, 梗係要幫我同木子影下相啦~
又幾好喎, 有你部相機, 搞到我唔想拎自己果出黎呀!
呢張相, 影得幾有feel
噢~天色灰灰地, 真係要襯返d懶有mood既相至得!
無乜野影, 時間仲係好早
咁就去食件cake先~
去左川善茶居, 原本都係抱住一試既心態
因為係香港食親綠茶味既野都好假, 好苦
但......估唔到......
呢間野真係好好味呀!!!!
我杯綠茶朱古力, 個cheese cake仲有個心太軟~
真係好味到顛~令我好回味!!!!!
lunch早食+食得唔多, 食完件cake仲食得落野
咁就提早食dinner啦~哈哈, 好似好大食!
食左北海道牧場餐廳
想試好耐, 一直都無機會~就今日食啦!
其實都係快餐~
但係我最欣賞個蛋上面有pat蘑菇汁, 好味呀!!!
食完諗住去cwb影聖誕波
但點知未開放~搞到有點點失落~
食完諗住去cwb影聖誕波
但點知未開放~搞到有點點失落~
但跟你一起真係好開心!
但你係爛玩, 但為左我遲出發早返歸~
你真係唔話得
訂閱：
文章 (Atom)