回顧 - Bingo當天

2014年4月27日 星期日

我地去完馬代返黎, 其實我都開始計劃下我地個plan

一路都諗住結婚後一年就準備啦~

但一返黎又準備搬屋, 真係超多野搞!

同埋我聽身邊朋友準備左好一段時間都唔中

所以我覺得我地又搬屋咁勞累

同埋呢d緣份唔係真係咁易有!!!!!

但係4月份, 我已經感覺唔同

唔係真係定係心理作用

果排成日勁易攰, 作嘔咁款!

所以我都估到自己應該bingo左

但一日未確實個心都羅羅攣

我平時m到係好準時

遲左一個星期, 買枝驗孕棒驗下先!

點知一試, 真係2條線

雖然話估到姐, 但確實左果下真係好忐忑架喎~

老公就好開心, 我就呆左咁!!哈哈

原本應該下一步係去睇醫生confirm

但我老公係醫護人士, 好理智

話依家根本太早睇醫生都無用

所以驗完就不了了之啦~哈哈

搞到我十五十六咁!

分享我們的喜悅 - 木子

2014年8月19日 星期二

勁疏落的出blog

原因係因為我。懷。孕。了

基本上所有紝娠有的反應我全部都中晒~

頭3個月攰到我終日訓床休息

食飽就訓, 訓飽又食, 老公話養豬咁養! 哈哈

仲有係咁作嘔, 有幾次都真係嘔得出, 辛苦到不得了

口味特變, 以前係到成日諗

我咁鐘意食日本菜, 第日有bb咪介得好辛苦

原來我既bb係完全唔鐘意食壽司同刺身, 望見都唔想食

亦都唔想食西餐, 淨係不停中餐中餐又中餐

依家已懷孕5個月, 21week啦! 

已經過左孕期既一半, 預產期係12月

我真係好想快d到果日接收我既聖誕禮物!

基本上呢件事係我地預期之內

但一知道果下都開心到彈起!

等我慢慢地回顧返之前既日子先得~

bb未出世我地要諗個乳名叫下佢, 同佢傾下計

我地諗到 - 木子!

木子性別已經知道架啦~遲下先講啦~哈哈!

一開頭諗住到3個月公佈比人聽啦

但聽人講, 照結構呢關好緊要

所以我一直等順利照完結構至出blog

好感恩, 木子一切生長得好好

所有野都符合晒佢既週數!

我可以好好咁買衫添置佢既野啦~

仲有值得開心既係, 我已經開始feel到佢係肚入面郁

好得意, 好似有條魚仔彈下彈下咁

尋日隔住個mon, 原來佢隻腳仔手仔一郁我會間唔中feel到彈彈下!

仲有仲有, 我既體力食力已經全部回復正常, 可以去玩啦~

馬灣一日遊

2014年8月9日 星期六

一直到想入去馬灣試下個buffet~

終於搵到一日入去啦!

入到去晏得滯, 馬灣公園close左

真係掃興, 激死人啦!!!!!

萬無目的咁周圍行周圍hea

最後估唔到我地3條友仔係百佳hea得最耐

因為有冷氣, 因為我地大家都好鐘意食~~

終於hea夠鐘入去食野啦~

我抱住用團購既心態入去, 預左都係一般

可能真係無期望就無失望, 仲出乎之料之外喎!

都算幾多野揀, D野仲要幾好食架喎~

因為掛住食, 真係無乜影相!

但最最欣賞既係海鮮蕃茄濃湯, 超香既蕃茄味, 好鮮甜~

但好可惜, 佢既甜品真係唔多掂

樣樣都係麻麻地~

食完就梗係影下相啦~個view真係靚到不得之了!

是日農曆7月14, 我地一齊嘻嘻哈哈就乜都無有怕~

係沙灘影左勁多相~

笑到出汗影到出汗熱到出汗!

我真係好鐘意夜景, 真係好靚好迷人~

影夠睇夠就走人啦~我地仲有下場, 哈哈

老公過黎接埋我地

我地齊齊上去觀景台~

上到觀景台係覺得好靚

但可能岩岩馬灣出返黎, 會覺得馬灣近d再靚d~

唯一影到汀九橋~但可惜影完呢張相之後佢就熄左燈
我地亦都要走人lu~
好滿足既一天!!!!!

強烈推介

2014年7月19日 星期六

我仲未放棄打blog

只不過生活太欠味道無咩好打

但星期六超想食烏冬

搵左位於紅磡同黃埔交界既稻庭養助黎試下

食完忍唔住要勁推介比朋友, 因為好岩我心水

環境比較暗, 只係用手機影, 所以d相質素都差d

一入到去, 咁岩真係大半座上客都係日本人

貼晒d是日推介又全部都係日文

果一刻真係覺得自已去左日本

我地叫左呢個雞軟骨魚餅

好有驚喜呀, 好好味呀!

佢魚餅好味, 而每一啖都充滿住雞軟骨既口感

我好鐘意!

仲叫左個炸芝士

好香~完全唔滯唔溜架!

食完好滿足~熱辣辣咁食至正~

老公叫左個炸雞冷烏冬(基本上佢炸野比較多)

炸雞正常無咩特別~但個冷烏冬真係好味~

我叫左個蔬菜天婦羅熱烏冬

嘩嘩嘩~不得了, 個湯式好清好清, 但又夠味喎

淨係齋烏冬我都夠食啦~真係好好味!

個蕃薯天婦羅好甜好好味呀~~

佢係幼身烏冬黎架~

係日本有唔同既分店!

呢間真係好岩我胃口, 食完真係好滿足呀~

雜記一則

2014年6月20日 星期五

時光飛逝, 2014年咁快又到年中! 

5月30日, 我地拍拖10年既大日子~

因為一齊耐左, 有好多野都好有密契

感激身邊人是你, 我們一同共渡了很多難關

以後將來, 我們有更多事情要一同面對~

因為掛住景逸軒既釀竹笙, 所以......

十周年慶祝活動就係返黎食餐飯!

估唔到, 當日負責我地婚禮既小燕認得我地喎~

真係好有親切感既姐!

很久很久沒有外出~

某日難得有mood, 提得起勁

一於走去長沙灣既牧羊少年食返個brunch先

一見到呢set野, 好感動

雖然係好簡單但因為太耐無出過街咁

所以好簡單既野都令我變得好快樂

同埋佢既烏冬都好好味! 

某日超想飲湯

老公煲左個蕃茄蘿白瘦肉湯配通粉我食

嘩~好味到講唔到野!

因為當一個人恨湯恨到發晒燒既時候

有人煲出一煲靚湯比我飲

果種感覺真係相當滿足

6月8日 星期日提早慶祝父親節

去了鯉魚門食海鮮

我咁大個女, 第一次入黎呢到!

入到黎岩岩好日落

可惜個天色唔靚

我相信如果天氣好既話個咸蛋黃一定好靚既姐!

今次book左南大門

行到最入最入果間

一路行入去沿途都好多海鮮檔係到兜售

同埋食店係到招客

佢呢間無海鮮買

但可以出去揀海鮮返黎比佢加工

其實價錢都幾合理! 唔算太貴

老爺至愛食海鮮, 所以佢食得好開心

叫左象拔耙2食, 刺身同椒鹽

老爺必叫既粉絲蒸扇貝

上湯龍蝦點解咁細隻既~條蒸魚好好味喎~

但講到最最好食既係呢碟椒鹽大瀨尿蝦

我第一次食咁大隻架咋!

好好味, d肉好鮮甜

d椒鹽整得好夠味, 我好欣賞呢碟野!

某天, 全公司出晒trip

得返我地3個, 仲唔作反咩, 哈哈

行遠少少食lunch

原本想食茶木, 但係一出lift見到勁多人嚇親

所以我地轉左去牛角

燒肉配白飯真係好好味呀!

但我叫左個蔥油雞腿拉麵都好好味

Happy Friday

2014年6月6日 星期五

難得星期五唔洗返學, 梗係即刻gogogogo

整返個happy friday啦~

走左去中環食英國菜

jon仔係英國返到黎都陪我地食返英國菜真係唔話得~

呢個set for 2人, 個牛好有牛味

個雞普通, 我超鐘意食d薯仔, 咸咸地幾好味

個餅係似牛角酥, 淋埋燒汁其實都幾好味~

重點, 我想食好耐架啦~

炸魚薯條!!!好期待好期待~~

黎到, 果然係好味, d魚都幾新鮮

jon仔話好食過英國呀!

但係炸魚得2舊, 我地3個人分唔夠喉!

不過佢一set for一個人食, 無預我地share黎食既, 哈哈

好好味好滿足既一餐

但可惜有人無book位

我地無得坐dinner果邊, 要坐bar果邊

成餐飯傾計要大大聲咁講野, 好似拗交咁

真係激死人

難得過到黎中環, 梗係去埋nightmarket啦~

一入到去好靚~好熱鬧, 滿心期待著的!

但由樓上行返落黎

真係無咩岩我睇, 無咩岩我買

我諗行一次真係夠晒啦!

回鄉飲宴。狼狽大雨

2014年5月8日 星期四

表哥結婚, 我地一家返去飲佢果餐~

好熱鬧, 好齊人, 好開心!

我地鄉下結婚興係個廟出面塔個棚就食飯!

其實當日天氣都好唔穩定

出發既時候就落好大雨, 要等細雨D先可以行過去

到彩到目的地都無雨, 一路食都相安無事

係食到尾段有D落雨, 咁岩我坐邊住

有D雨飛入黎要開姐檔檔雨

點知食完晒啦~D人諗住走啦!

嘩, 嘩, 嘩~超級大雨呀, 搞到走唔到

個個都坐係到等!

因為個棚係塔出黎, 隙與隙已經成為左瀑布

而頭頂開始係咁滴水, 地下又開始水浸

我唯有拎住把姐雙腳塔係張櫈到等細雨

真係好狼狽呀!!!!

此時救星到, 舅母拎左大"姐"

同拖鞋比我地3姊弟

行返去舅母屋企只需3分鐘! 但都足以全身濕呀!

表妹依然留守原地, 諗住細雨D走人

但最後佢要除鞋走返舅母屋企

呢張相係佢最後影架, 個地下已經浸到至少腳眼位!

真係超難忘超狼狽既一次飲宴