100日人仔

2015年3月26日 星期四

話咁快, 呢個人仔又到一百日啦~

當日滿月淨係老公屋企人食左餐飯

因為當時家姐坐月, 媽咪去左照顧佢!

所以今日木子一百, 2家人齊齊食餐飯先~

買左條裙仔比木子著

算係佢第一條裙, 好隆重其視今日既一百架!

仲order左d cupcake

預左好睇唔好食

收到覺得好靚呀, 因為我至愛既紫色~

可能無期望, 反而覺得又幾好味

上層係甜架啦, 但又唔會甜到入唔到口既!

當日佢心情唔太好

得好少相, 但好彩張全家幅佢都有望鏡頭!

爸爸媽媽祝你身體健康

快樂成長, 做個開心快活人就夠啦~

黎個cupcake closeup先

真係幾靚架!

但佢英文名可能長得滯, 搞到好難睇到

大伯送左件好浮誇既衫仔比佢!

洗左即刻著

件衫仔for 6 months

但佢依家著叫岩岩好

頂帽已經唔係好帶到啦喎~

原來小朋友著咁浮誇既衫仔真係超得意~

木子3個月

2015年3月17日 星期二

話咁快又一個17號~

木子佢又大一個月, 時間過得好快

咁就過左3個月啦!

Happy 3 month

呢個月最大轉變係唔會成日喊

擺佢係床仔可以自己玩好耐架啦!

玩到攰喊2聲就可以訓, 真係好欣慰~

同埋佢多左好多反應比你

朝早起身, 同佢講早晨, 佢會好甜好甜咁對住你笑

佢笑既時候真係冧死人~

早前帶左佢去影樓影相

初初真係好擔心佢會爆喊

我預左無咩相架啦~

點知佢果日好合作

放低佢都無喊, 我同老公真係覺得好神奇

到後期, 佢應該開始攰啦~

所以開始喊!

但係我覺得佢喊既樣真係實在太可愛!

d朋友都話佢扁咀喊個樣好得意

每逢佢喊我同老公都覺得佢好得意

我真係覺得有點兒變態, 哈哈

仲好記得大肚既感覺

仲好記得木子係肚入面游黎游去既感覺

話咁快佢已經3個

願你永遠幸福, 健康, 快樂地成長下去

我返左工都個幾星期

因為之前產假一路都train佢作息要定時

每日,8am, 11am, 2pm, 5pm, 8pm, 11pm食奶

返工都唔算好辛苦

每日流程係7點半起餵佢食奶

跟住就出門口, 如果老公返早奶奶會落黎

如果老公返晏奶奶佢晏d落黎

 返到公司9:00am泵奶

跟住到1:30pm泵奶, 如果好彩既5:30pm都可以泵多次

因為我奶量唔算多, 所以如果泵到3次就夠第二日食

暫時都唔洗食冰奶住

放工滾水淥腳咁返屋企

老公返早佢煮定飯我返去食

如果佢返早娥就拿拿聲買餸返去煮

根本上我返到去奶奶就可以走(佢住我樓上2層)

7點半要幫佢沖涼, 沖完就食奶~

呢段時間放係床仔比佢自己玩

我就可以做下家務, 之後同佢玩下

好快又食奶, 最尾呢轉佢要食一個鐘(食到差唔多12點)

跟住佢就會訓覺, 好彩既會訓到第二朝7點半我叫佢起食

唔好彩既, 佢會4點零5點自己喊醒要食奶!

半夜我寧願訓多d, 所以無起身泵奶~

但都希望會越黎越多啦!

因為佢大個會越黎越大食, 擔心佢唔夠食咋!

懐孕日誌

2015年3月16日 星期一

已經返左一星期工

個個都問我, 有無掛住個女

真係有d掛~但返左工後我知道自己都唔太岩做全職媽媽

又到左星期一, 回顧返大肚先

一知道有左bb, 我就keep住每個星期都影張相

紀錄一下個肚既變化!

但好慘最尾2星期d相又無晒

真係好想喊呀!!!!

頭4個月, 基本上我到3個月先開始每星期一張相

因為我覺得踏入3個月先叫穩定

我先有信心繼續影落去!!

頭4個月變化不大~有肚我都係估係肚腩黎既!

4個-6個月個肚明顯大過之前

不過我都覺得係大d既肚腩

因為著左衫基本上都唔發現我大肚~

都無乜人讓座

呢排係最舒服既!因為個肚唔大

但懷孕既不適無無乜喎!

可以周圍去玩, 不過果陣係夏天, 個人特別熱

郁一郁都成身汗, 好似沖完涼咁, 超誇張

6-8個月

個肚又大d~不過依然輕鬆!

叫做著貼身少少既衫會有人讓座比我~

其實我覺得木子都算鍚住我

陀住佢唔算太辛苦

只係天氣熱搞到我勁易出汗

同易攰少少之外, 我都可以如常活動架!

到左8-9個月個肚大啦大啦

我終於覺得自己似個大肚婆啦, 哈哈!!

亦開始有身體既不適

例如佢會壓住我個膀胱, 腰骨會痛之類啦~

仲有後期開始既失眠

到左wk 35後啲相無左~

wk 35之後真係覺得個肚大得快左

好似吹脹左個肚咁!

人亦都變得論盡左~

係醫院臨生前當然影返張相!

最後呢張相, 木子就出左黎lu~

咁樣就完左我個懷孕期~

我真係覺得人生好奇妙!

睇住個一日一日咁大

木子一日一日咁大

佢已經唔可以塞返入去我個肚到!

我亦感覺唔到佢係我肚游黎游去既感覺~

懐孕令我上左一課寶貴既體驗

結婚2週年

2015年3月9日 星期一

星期一, 亦係我同老公結婚2年既日子

我地提早一日放低木子去食餐dinner慶祝一番

原本影左相諗住打blog, 點知張SD咭壞左

d相無晒, feel so sad~

不過永遠都記係心入面架啦!

我地去左Steakhouse試下佢d扒

本人覺得一般~又唔會話超好味!

但叫左佢既龍蝦湯同蟹餅就好好味啦!

老公, 多謝你~

你盡力滿足我想要既野~

呢3個月我情緒真係好大起落

你不停咁安慰我, 支持我!

多謝晒!

攝於2013年3月

我們終於結婚了!

攝於2014年3月

結婚一年, 我終於去到馬爾代夫

很美好的回憶

攝於2015年3月

結婚2年, 我終於有左自己既小朋友

每年都拎返上年張相黎影相

我深信若干年後睇下一定好得意

雖然張相好細張, 哈哈!

湊囡2個月

2015年2月18日 星期三

尋日木子已經2個月，仲有半個月我就返工，時間真係過得好快！happy 2 months my lovely girl!!

基本上一得閒就佢出街！佢由初初出街驚到唔訓變到依家一出街就訓覺啦！

呢個月最明顯既進步係佢可以自己玩多左一陣！但真係一陣架咋！當佢自己玩既時候好多時都會笑！笑到出聲真係好得意

呢個月，佢發現左自己隻手，成日都食手！仲會玩口水，就算訓左都要玩，幫佢抺口水佢會奸笑，勁奸仔！

單邊揹帶太辛苦，買左個雙肩揹帶！有左呢條揹帶出街太舒服啦～一揹佢就會訓著左架啦！

聽日就大年初一，木子係到祝大家恭喜發財，身體健康，羊羊得意

湊囡個半月

2015年1月30日 星期五

話咁快湊囡已經湊左個半月！

但實際自己湊只係湊左半個月～

真係要磨合！真係爭啲抑鬱咁滯！

因為要搞證件，所以影左第一張證件相

佢果陣訓緊覺！比我摷醒左！所以個樣好懞豬豬咁～同埋唔知點解塊面變左咁大塊！好得意😘

1月17日木子滿一個月，同屋企人出去食餐飯！梗係要著靚靚出去啦！但木子個樣一啲都唔女仔！哈哈 happy one month baby~

湊佢開頭真係out of my control！搞到個人勁忟！因為佢清醒時係床仔唔可以自己玩！要人抱，如果唔係會喊！試過唔理佢，真係可以喊足2個鐘，喊到下餐奶！勁長氣，搞到我勁嬲佢！成日對住老公喊，老公不停安慰我！我依家叫做捉摸到少少～首先朝早有2餐奶食完後唔比佢訓！咁佢夜晚就會訓到。同埋擺佢落high chair搖佢咁就唔洗抱佢，係隻腳攰啲但隻手可以free出黎！

仲有一得閒就帶佢出街，因為要我成日留係屋企我會發毛！出街人都身心舒暢啲！

本身出街係手抱或推bb車！但2者都有缺點，淘左條揹帶！勁方便，可以自己揹住佢去邊都得，超滿意！

望住佢個樣個個人都話十足mini老公咁！但我點望都唔太覺喎！某啲角度其實都幾女仔架！

某日去左探家姐！木子年紀細細已經做左表姐！表妹細大半個月，但可惜果日佢好扭計，所以無張似樣既合照！但遲啲一定影到既！

又有一日去左朋友屋企，呢個bb細木子5日，原本佢係姐姐，但木子早左出世就變左姐姐！2個bb好得意，希望你地可以做到好朋友！

朋友比左件巴斯光年衫木子，幫佢著起個樣真係好男仔！同埋個樣超大個，一啲都唔似得個半月人仔！呢樣影得佢好可愛！我諗做人父母都係覺得自己個囝囡特別可愛架啦！哈哈

木子就黎滿月

2015年1月11日 星期日

湊住木子啲時間真係過得好快好快！

未坐月時成日諗成個月無得出街咪好悶囉？成個月都食中餐咪好乏味？

但點知原來湊住佢咩都諗唔到咁多！

我下星期就坐完月～但呢個月真係超乖！淨係去健康院出過去同埋有次陪月放假偷走落樓下m記食左個早餐，其餘時間我真係跟足指示去坐月！

原來湊仔比我想像中困難好多

因為我堅持喂人奶，頭頭果陣佢成日喊，我覺得係唔夠奶！喂到我崩潰～因為一次喂成個鐘！擺落床仔又勁喊！

之後夜晚果餐補奶粉，我訓得好少少先叫好返啲！

到依家，佢開始要適應呢個世界，可以喪喊幾個鐘，要安全感抱住佢！我對住佢真係好無奈！淨係諗已經食飽又換左片點解仲喊架？佢喊得好淒涼大大滴眼淚!搞到我都喊埋一份～

好好彩，我有個好老公，佢請左1個月大假幫我手！夜晚果餐奶同哄佢既功夫根本上佢做晒！所以搞到佢依家日夜顛倒左！我喊佢不停安撫我～如果無佢係身邊我可能已經諗埋一邊啦！

對住隻小魔鬼真係又愛又恨，佢喊扭計時真係想唔理佢！但見到好滿足咁訓食同周圍望時又覺得佢好可愛!不過只要佢健康快樂成長就咩都無所謂啦！